#КитапУҡырғаСаҡырабыҙ! #ПриглашаемкЧтению!
#ЯңыКитаптар #КнижныеНовинки
Яңы китаптар килдеме?
Китап уҡырға яратыусылар был һорауҙы йыш бирә. Ҡайһы бер китапханабыҙ дуҫтары фондтағы китаптарҙың күбеһен уҡыған, шуға күрә яңы китаптар килгәнен көтөп кенә торалар.
Һөйөнсө, китапҡа ғашиҡ дуҫтарыбыҙ! Һеҙҙе яңы килгән китаптар менән таныштырабыҙ.
1. Башҡортостандың халыҡ шағиры Мостай Кәрим "Әҫәрҙәр"енең XI томына авторҙың төрлө йылдарҙа яҙылған очерктары, баһаламалары, мәҡәләләре, хаттары индерелгән.
2. Күренекле яҙыусы Аҫылғужа Баһумановтың “Һайланма әҫәрҙәр” китабының I томы. Билдәле яҙыусының “Һайланма әҫәрҙәр”е авторҙың тыуыуына 75 йыл тулыу уңайы менән нәшер ителә. I томға “Салауаттың йәше” романы ингән. Бында һүҙ Салауаттың йәше тураһында ғына бармай, халыҡ йәше, милләт йәше, башҡорт күтәрелештәренең йәше хаҡында ла бара. Романда киң эпик полотнола XVIII быуат аҙағындағы башҡорт халҡының тормошо, милли азатлыҡ хәрәкәте күрһәтелә. Автор Салауаттың йәштән үк төплө уй-фекерле, һәр нәмәгә, бигерәк тә ер, халыҡ, ихтилалдар, батырҙар шәхесенә ҡағылған мәсьәләләргә етди ҡарашлы булып үҫеүен ентекле, эҙмә-эҙ һүрәтләй. Роман үҙенең тел байлығы менән дә айырылып тора. Бында һүҙлектәргә инмәгән байтаҡ ҡына ят һүҙҙәрҙе тап итергә мөмкин. Башҡорт еренең рухи һәм мәҙәни байлығынан тыш тәбиғәт байлыҡтары тураһында мәғлүмәт һәм этнографик материалдар күп.
3. Билдәле яҙыусы, фәйләсүф Әхмәр –Ғүмәр Үтәбайҙың “ Ғәфү ит, ғүмер” китабында кеше күңеленең матурлығы, йәшәйеш хәҡиҡәтен эҙләү, тормош һәм мөхәббәт темалары яҡтыртыла. Ул яҙыусының үҙе кеүек ябай, шаян һәм тәрән фәлсәфәле. Йыйынтыҡта киң мәғәнәле, тәрән фәлсәфәле күренештәр, хәл-ваҡиғалар, образдар кәүҙәләндерелгән. Автор әйтеүенсә, һуңғы ваҡытта ғүмер ҡыл өҫтөндә торған кеүек. Был Хоҙайҙан ебәрелгән иҫкәртмә, киҫәтеүме? Барыһын да китапта уҡып белергә мөмкин.
4. Марсель Сәлимдең "Тишекле таш" китабындағы төрлө илдәрҙә, төрлө телдәрҙә донъя күргән әскелле-сөскөллө, сәнскеле-төрткөлө әҫәрҙәре бер кемде лә битараф ҡалдырмай. Уларҙы уҡып берәүҙәр көлә, берәүҙәр көйә, кемдер йылмая, кемдер турһая... Бына шундай һайланған-яйланған әкәмәт әҫәрҙәр теҙмәһенең беренсе китабына яҙыусы-сатирик төрлө йылдарҙа ижад иткән ҡыҙыҡ-мыҙыҡ бәйәндәр, тамашалар, кәмиттәр тупланған.
5. Башҡорт әҙәбиәте белгесе, шағир, уҡытыусы Риф Әхмәҙиевтың “Йәйғор ғүмере” тип исемләнгән китабында авторҙың һуңғы бер нисә йыл эсендә яҙылған әҫәрҙәре урын алған. Унда шулай уҡ тәнҡит тарафынан ыңғай баһаланған, уҡыусылар яратып өлгөргән шиғырҙар индерелгән. Йыйынтыҡҡа тупланған әҫәрҙәр автор шиғриәтенең тематик төрлөлөгөн, идея-эстетик юғарылығын һәм образлы ассоциатив сараларға бай булыуын дәлилләй.
6. Земфира Сәхипова “Тыуған ерем, туған телем”. Автор был китабында мәктәпкәсә йәштәге һәм башланғыс класс уҡыусыларына шиғырҙар, хикәйәләр, йомаҡтар, һанашмаҡтар тәҡдим итә.
5. Башҡорт әҙәбиәте белгесе, шағир, уҡытыусы Риф Әхмәҙиевтың “Йәйғор ғүмере” тип исемләнгән китабында авторҙың һуңғы бер нисә йыл эсендә яҙылған әҫәрҙәре урын алған. Унда шулай уҡ тәнҡит тарафынан ыңғай баһаланған, уҡыусылар яратып өлгөргән шиғырҙар индерелгән. Йыйынтыҡҡа тупланған әҫәрҙәр автор шиғриәтенең тематик төрлөлөгөн, идея-эстетик юғарылығын һәм образлы ассоциатив сараларға бай булыуын дәлилләй.
6. Земфира Сәхипова “Тыуған ерем, туған телем”. Автор был китабында мәктәпкәсә йәштәге һәм башланғыс класс уҡыусыларына шиғырҙар, хикәйәләр, йомаҡтар, һанашмаҡтар тәҡдим итә.
7. Рәсәйҙең һәм Башҡортостандың халыҡ артисы, Салауат Юлаев исемендәге дәүләт премияһы лауреаты Хөрмәтулла Үтәшев тураһында «Таштуғайҙың ике батыры: Хөрмәтулла Үтәшев. Тормошо һәм ижад юлы» исемле китап-альбом. Баҫмала театр тәнҡитселәре, актерҙың коллегалары фекерҙәре, шулай уҡ Хөрмәтулла Ғаззали улының хәтирәләре урын алған. Һуңғы бүлектә Ғаззали батыр тураһында мәҡәлә баҫылған. Китаптың һуңғы биттәрендә актерҙың тормош һәм ижад юлының төп ваҡиғалары, уйнаған ролдәр исемлеге, Хөрмәтулла Үтәшевтың руссанан башҡортсаға тәржемә иткән пьесалар исемлеге урын алған.Китаптарҙы Сибай ҡалаһының Тыуған яҡты өйрәнеү модель китапханаһынан (Чайковский урамы,30) алып уҡырға була. Рәхим итегеҙ!